اول كلامنا سلامنا يطوف ع السامعين معنا

في البدايه انا مش عارف اكتب ايه بس المفروض اكتب

لاني المفروض عامل المدونه دي علشان اكتب اللي انا عايزه

وكمان المفروض انكم داخلين علشان تقروا اللي انا كتبه

المهم نفضنا من منولوج المفاريض ده علشان ممكن تلاقي شخص

يقولي امشي يابن المفروضه انت عامله علشان تفترض

المهم برده انا هابتدي الكتابه عن المدونه

والمدونه دي انا عاملها مش علشان يبقي عندي مدونه وخلاص

او علشان اكتب في مجال معين بس هيه انشا الله هاتكون شامله اي حاجه بحبها

يعني متتخضوش لما تلاقو موضوع يشتم في الحكومه وبعديه موضوع

عن المسرح او الادب مثلا او مثلا بغني اقول ابوتريكه ابوتريكه زي ما بيقولها

المطرب المصري الميد ان ايجبت سعد الصغنن

وزي مابيقول عبدو الحليم ابوحافظ

لو بدينا ياحبيبي نبتدي منين الحكايه

نبتدي منين الحكايه هو ده السؤال

ابتدي منين.........

مقدمه طويله ومتاكد ان محدش هايكملها للاخر او هيجر الفاره ويقولي لخص ياعم الامور

بص ياسيدي انا بقي ممكن تقول عليا عايش دور الفنان وهو علي فكره دور صعب اوي

يعني عادات مختلفه عن بقيت البشر اوعي تفهم غلط يعني مش بمشي علي ايدي

بحب حاجات كتير جدا

تقدر تقول عليا حاجه كده متلخبطه خدوا من كل حاجه شويه ولخبطوها فيه

يعني تلاقيني احب السياسه واحب اتابعها وبستمتع جدا اكاذيب الحكومه

بحب ايمن نور وبحس ان الراجل ده هيتسجل في التاريخ الحقيقي مش المزور بتاع دراسات تالته اعدادي

زي مثلا مانديلا او جيفارا او سبارتكوس او ادهم اشرقاوي او ناس كتير مش هاصدع دماغك بيها

بحب المسرح او بتنفس مسرح ومش اي مسرح المسرح اللي بيمتعني في الاول والاخر

بحب منير وعبدالحليم وفيروز وام كلثوم وعبدالمطلب وعمرو وروبي وناس كتير اوي

بحب عمار الشريعي وبليغ حمدي وعبدالوهاب وعمر خيرت وبسمع كمان مزيكا فلكور يوناني

والماني واسباني وبسمع هارد ميتل ومزيكا من امريكا الاتينيه ووسط افريقيا ومزيكا يعني في خلاط في دماغي

معظم ممثلين مصر مش بحبهم لاني بمثل احسن منهم او فنان اكتر منهم لاني مش

بحب اللي واخد الفن مهنه او حاجات غريبه كده بس هما في منهم بيمثل كويس

بحب عبدالناصر واتمني لو كنت في عصر عبدالناصر

اني اكون ناصري او اشتراكي لاني بحب الاشتراكيه لاني من الطبقه الكادحه

انا طولت صح وطولت اوي بس كفايه اوي النهارده كده

وسلامووووووز